Еркин Қарақалпақстан Вести Каракалпакстана 13:44:55, 26.05.2019
Хош келипсиз! | RSS
Сайт мазмуны

Кириў усылы

РАЙОНЛЫҚ ГАЗЕТА ГРАНТ ЖЕҢИМПАЗЫ

Шымбай районлық «Шымбай ҳаўазы» газетасы жәмәәтиниң «Саламат турмыс тәризи-саламат әўлад негизи» темасындағы жойбары Өзбекистан Республикасы Олий Мажлиси жанындағы мәмлекетлик емес коммерциялық емес шөл­кемлерди  ҳәм пуқаралық жәмийетиниң басқа да инс­титутларын қоллап-қуўатлаў жәмийетлик қоры тәрепинен жәрияланған грант таңлаўының жеңимпазы болды.

Усы мүнәсибет пенен район ҳәкимлигинде өткерилген баспасөз конференциясына Қарақалпақстан Республикасы Баспасөз ҳәм хабар агентлиги, Пуқаралық жәмийетин мониторинг етиўши бийғәрез институтының Қарақалпақстан аймақлық бөлими, Өзбекистан Журналистлери дөретиўшилик аўқамы Қарақалпақстан бөлими, райондағы бир қатар кәрхана, мәкеме, шөлкемлердиң, оқыў орынларының, ғалаба хабар қуралларының ўәкиллери қатнасып, жыйналғанларға жойбардың мақсети және ўазыйпалары туўралы кең түрде түсиник берилди.

— Тийкарғы мақсетимиз кең жәмийетшилик, соның ишинде, жасларымыз арасында саламат турмыс тәризин кеңнен үгит-нәсиятлаў, аймағымыздың экологиялық, санитариялық-гигиеналық жағдайын жақсылаў, солай етип инсан саламатлығына кери тәсир етип атыр­ған машқалаларды өзин-өзи басқарыў уйымлары, оқыў орынлары, районлық медицина бирлеспеси, тәбиятты қорғаў ҳәм басқа да мәпдар шөлкемлер менен биргеликте шешиўге өз үлесимизди қосыўдан ибарат,-дейди «Шымбай ҳаўазы» газетасының редакторы Раўаж Утепбергенов. — Жойбар «Саламат ана ҳәм бала жылы»нда әмелге асырылыўы менен де әҳми­йетли. Жойбар шеңберинде  газетаның ҳәр бир санында «Саламат турмыс тәризи-саламат әўлад негизи» темасында арнаўлы бет ажыратылып, онда «Тазалық-саламатлық гиреўи», «Тәбият ҳәм биз», «Саламат турмыс тәризи ушын», «Қәнигениң кеңеси», «Экология ҳәм саламатлық» рубрикаларында мақалалар жәрияланып барылады.

Қарақалпақстан хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF