Еркин Қарақалпақстан Вести Каракалпакстана 20:01:22, 25.08.2019
Хош келипсиз! | RSS
Сайт мазмуны

Кириў усылы

АЎЫЛ ХАЛҚЫНА ТАЗА ИШИМЛИК СУЎЫ

«Экосан» экология ҳәм саламатлық халықаралық қайырқомлық жәмийетлик қорының Қарақалпақстан аймақлық шөлкеми тәрепинен «Саламат ана ҳәм бала жылы» Мәмлекетлик бағдарламасын орынлаў бағдарында Шымбай районында және бир жойбар әмелге асырылды.

Жақында «Тағжап» аўыл пуқаралар жыйыны аймағындағы «Киши жәдик» аўылына районлық абаданластырыў басқармасы ҳәм «Инженерлик тармақлар қурылысы» жуўапкершилиги шекленген жәмийети тәрепинен 2 километр узынлықтағы суў тармағы тартылып, бул ушын 119, 4 миллион сум қаржы ажыратылды. Нәтийжеде усы аўылда жасаўшы 25 хожалық ишимлик суўы менен тәмийинленди.

— 2011-жылдан берли ра­йон турғынларын ишимлик суў менен тәмийинлеў, интернат үйинде жасаўшы кекселерди социаллық қорғаў мақсетинде жәми 312,1 миллион сумлық жойбар тийкарында жумыс алып барылды,-дейди «Экосан» экология ҳәм саламатлық халықаралық қайырқомлық жәмийетлик қоры Қарақалпақстан аймақлық шөлкеминиң директоры Нурлыбек Мырзамуратов. — Атап айтқанда, райондағы «Қызылөзек» суў бөлистириў станциясына улыўма баҳасы 67,1 миллион сумлық 3 дана скважина қурылған болса, район орайындағы А.Турымбетов көшесине «Жер асты суў булағы» жуўапкершилиги шекленген жәмийети тәрепинен баҳасы 85,1 миллион сумлық узынлығы 2 километр  болған суў тармағы тартып берилди. Соның есабынан 264 шаңарақ, сондай-ақ, усы көшениң бойында жайласқан бир қатар улыўма билим бериў мектеплери таза ишимлик суўынан пайдаланыў имканиятына ийе болды.

Буннан тысқары, «Экосан» экология ҳәм саламатлық халықаралық қайыр­қомлық жәмийетлик қорының Орайлық аппараты, оның Қарақалпақстан аймақлық шөлкеми тәрепинен Қарақалпақстан Республикасы Министрлер Кеңесиниң бирден-бир буйыртпашы хызмети «Инжиниринг компаниясы» менен биргеликте дүзилген шәртнамаға муўапық, райондағы «Таза жол» ҳәм «Бахытлы» аўыл пуқаралар жыйынлары турғынлары ушын баҳасы 15,9 миллион сум болған 13 дана жер асты баспа краны қурып берилди. Райондағы «Мүриўбет» майыплар ушын ерлер интернат үйин үзликсиз электр энергиясы менен тәмийинлеў мақсетинде қуяш технологиясына тийкарланған фотоэлектр станция қурылып, иске түсирилди. Соның менен бирге еки кексеге майыплар арбашасы тапсырылды.

Бундай жойбарлар республикамыздың басқа ра­йонларында да алып барылмақта.

Д.АБИБУЛЛАЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF