Еркин Қарақалпақстан Вести Каракалпакстана 21:10:17, 25.08.2019
Хош келипсиз! | RSS
Сайт мазмуны

Кириў усылы

УЧАСТКАЛЫҚ САЙЛАЎ КОМИССИЯЛАРЫНЫҢ ЖУМЫСЫН НӘТИЙЖЕЛИ ШӨЛКЕМЛЕСТИРИЎ

Усы жыл 1-ноябрь күни 1-Қарақалпақстан округлик сайлаў комиссиясының үлкен мәжилислер залында Өзбекис­тан Республикасы Президентин сайлаўды өткеретуғын участкалық сайлаў комиссия­лары ағзаларының ҳуқықый мәдениятын және де арттырыў, олардың жумысын нәтийжели шөлкемлестириў мәселелерине бағышланған семинар-тренинг болып өтти.

Онда  Өзбекистан Республикасы Олий Мажлиси Нызамшылық палатасының депутатлары, Қарақалпақстан Республикасы Жоқарғы Кеңесиниң комитет баслықлары, ҳүкимет ағзалары, Пуқаралық жәмийети қәлиплесиўин мониторинг етиўши бийғәрез институтының  аймақлық бөлими, Қарақалпақстан Республикасы Әдиллик, Қаржы, Ишки ислер, Халық билимлендириў, Денсаўлықты сақлаў,  қала ҳәм район ҳәкимликлериниң шөлкемлестириў-қадағалаў топарларының  басшылары, тийисли шөлкемлер менен  кәрханалардың жуўаплы хызметкерлери, ғалаба хабар қуралларының ўәкиллери қатнасты.

Семинар-тренингти  1-Қарақалпақстан округлик сайлаў комиссиясының баслығы У.Жалменов басқарып барды.

Илажда Орайлық сайлаў комиссиясының хаткери Суяржон Қурбанқулов шығып сөйлеп, Өзбекистан Республикасы Президенти сайлаўын өткериў бойынша сайлаў комиссиялары жумысының ҳуқықый тийкарлары туўралы толық мағлыўмат берди. Сондай-ақ, участкалық сайлаў комиссияларының жумысын нәтийжели шөлкемлестириў ушын районларда өткерилетуғын семинар-тренинглер процесинде экспертлер тәрепинен итибар қаратылыўы зәрүр бол­ған ўазыйпаларға тоқтап өтти. Атап айтқанда, илажларда тек баянат оқыў менен шекленип қалмастан ашық сөйлесиў тәризинде өткериў бойынша өз усынысларын билдирди. Сөз болған әҳмийетли мәселелер қатарында быйылғы Президент сайлаўында көзи әззи инсанлардың даўыс бериўи ушын да кең имканиятлар жаратылып атырғанлығы атап өтилди. Участкалық сайлаў комиссияларының сайлаўға таярлық дәрежесин және де арттырыў мақсетинде ҳәр бир округ шеңберинде таңлаў шөлкемлестирилип, оған бола ең жақсы участкалық сайлаў комиссияларын хошаметлеў нәзерде тутылмақта.

Пуқаралық жәмийети қәлиплесиўин мониторинг етиўши бийғәрез институты Қарақалпақстан аймақлық бөлиминиң бас қәнигеси Қ.Исмаилов, Қарақалпақстан Республикасы Әдиллик минис­три, Орайлық сайлаў комиссиясының ағзасы Ж.Садықов ҳәм басқалар шығып сөйлеп, сайлаў комиссиялары жумысының ҳуқықый тийкары, сайлаўшылардың дизимин дүзиў, даўыс бериў процесин  шөлкемлестириў ҳәм оны өткериў мәселелерине тоқтап өтти.

Семинар-тренингте Орайлық сайлаў комиссиясының экспертлер топарының ағзасы Айбек Турсунов шығып сөйлеп, участкалық сайлаў комиссияларының ҳуқықый билимлерин жетилистириў мәселелерине айрықша итибар қаратып, участкаларды методикалық қолланбалар, ҳуқықый әдебиятлар менен толық тәмийинлеў, олардың материаллық-техникалық базасын беккемлеў бойынша кешиктириўге болмайтуғын ўазыйпаларға тоқтап өтти.

Сондай-ақ, Орайлық сайлаў комиссиясының ағзасы Жаңабай Садықов сайлаўға шекем ҳәм сайлаў күни участ­калық сайлаў комиссиялары тәрепинен орынланатуғын жумыслар, атап айтқанда, сайлаў күни ерте ҳәм даўыс бериў процеси тамамланғанға шекем болған сайлаў процесслерин нызамшылығымызда белгиленген тәртипте орынлаў лазымлығына итибар қаратты ҳәм бул бойынша өзиниң ти­йисли усынысларын берип өтти.

Илажда шығып сөйлегенлер тәрепинен участкалық сайлаў комиссияларының жумысын шөлкемлестириў, қаржыландырыў, сайлаўшылардың дизимин алыўдың өзине тән өзгешеликлери, мүддетинен бурын даўыс бериўди шөлкемлестириў, сайлаўлардың ашық-айдынлығын ҳәм жәриялылығын тәмийинлеўде ғалаба хабар қуралларының роли ҳаққында толық мағлыўмат берилди.

Ашық сөйлесиў тәризинде өткен семинар-тренингте қатнасыўшылар өзлерин қызықтырған сораўларға эксперт ҳәм қәнигелер тәрепинен толық жуўап алды.

Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF