Еркин Қарақалпақстан Вести Каракалпакстана 12:54:25, 26.05.2019
Хош келипсиз! | RSS
Сайт мазмуны

Кириў усылы

«ХОЖАН АЎЫЛ» БАЛАЛАРЫНА ҒАМҚОРЛЫҚ

ЯМАСА ӨЗБЕКИСТАН ҚАҲАРМАНЫ АЛЛАНИЯЗ ӨТЕНИЯЗОВ САЛҒАН МЕКТЕП ИМАРАТЫНЫҢ ЖАҢА КЕЛБЕТИ ҲАҚҚЫНДА

Нөкис қалалық халық билимлендириў мәкемелери хызметин методикалық тәмийинлеў ҳәм шөлкемлес­тириў бөлимине қараслы 35-санлы улыўма орта билим бериў мектеби пайтахтымыздың «Хожан аўыл» елатында жайласқан. Бул мектеп дәслеп 1996-жылы пидайы инсан, көп жыллар даўамында келешек әўладларға тәлим-тәрбия берген тәжирийбели устаз, Өзбекистан Қаҳарманы, марҳум Алланияз Өтениязов тәрепинен 80 орынға мөлшерленип салынып, аўыл балаларына саўға сыпатында тапсырылған еди.

2007-жылы «2004-2009-жылларда Мектеп билимлендириўин раўажландырыўдың мәмлекетлик улыўма миллий бағдарламасы»на муўапық мектепке капитал реконструкция жумыслары әмелге асырылды. Яғный, бурынғы оқыў имараты жанынан 80 орынға мөлшерленген қосымша арнаўлы пән кабинетлери, спорт зал, химия, биология, физика лаборатория ханалары салынып, бирқанша мүмкиншиликлер жаратылды.

— Бурын мектебимиз 24-санлы мектеп болып, Нөкис районлық халық билимлендириў бөлимине қараслы еди. Ал, 2015-жылдың январь айынан баслап Нөкис қалалық ХБМХМТ ҳәм ШБ не қараслы 35-санлы улыўма орта билим бериў мектебине өзгертилди. Быйылғы жыл педагогикалық жәмәәтимиз ушын күтә қуўанышлы жыл болды. Себеби, мектебимиз 2016-жыл­ғы «Мәмлекетлик инвестиция бағдарламасы»на киргизилип, «Нөкис строй базис технология» жуўапкершилиги шекленген жәмийетиниң қолы гүл қурылысшылары тәрепинен еки қабатлы 240 орынлық жаңа оқыў бинасы салынып, 80 орынлық бурынғы имаратқа жеңил оңлаў ислери әмелге асырылды. Жаңа оқыў жылынан баслап оқыўшыларымыз заманагөй мектепте билим алмақта,- дейди мектеп директоры Перуза Ималатдинова. — Бүгинги күни мектепте 845 оқыўшы жаслар оқып атырған болса, оларға 75 муғаллим тәлим-тәрбия бермекте. Спорттың волейбол, баскетбол, футбол, шахмат-шашка ҳәм бас­қа да түрлеринен сек­циялардың ҳәрекет етип тур­ғанлығынан оқыўшылар арасында спортты раўажландырыўға да айрықша кеўил бөлинип атырғанлығын аңлаў қыйын емес. Жаңа педагогикалық технологияны сабақ барысында қолланыўда мектеп муғаллимлериниң мийнетлери айрықша. Олардан З.Арзымбетова, А.Сарыбаева, А.Салиева, Д.Сапарова, Н.Еримбетова, Г.Қунназаровалардың атларын ҳүрмет пенен атап өтсек орынлы.

Оқыўшыларымыз усындай заманагөй имаратта билим алып атырғанлығынан жүдә қуўанышлы. Биз устаз муғаллимлер усындай жасларымызға жаратылып атыр­ған имканиятлардан нәтийжели пайдаланып, келешегимиз болған бул жас әўладларды жетик ҳәм ҳәр тәреплеме билимли етип жетилистириўге пидайылық пенен ҳәрекет етемиз,-дейди усы мектеп директоры П.Ималатдинова қуўаныштан толқынланып.

Ҳақыйқатында да, билимниң тийкарғы басқышы мектептен басланады. Сол ушын да, мәмлекетимизде тәлим-тәрбияның негизине айрықша кеўил бөлинбекте. Демек, усындай тәлим дәргайларында билим алып атырған оқыўшылардан жаңа нәтийжелер, табыслар күтиўимизге болады.

Г.САПАРОВА, арнаўлы хабаршымыз.

СҮЎРЕТЛЕРДЕ: 1. Мектеп имаратының жаңа көриниси. 2. Биология пәни муғаллими З.Арзымбетова лабораториялық сабақ пайытында. 3. Дене тәрбиясы пәни оқытыўшылары М.Хабибуллаев ҳәм  Р.Исабаев мектеп оқыўшылар арасында.

Ә.ОРАЗОВтың түсирген сүўретлери.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF