Еркин Қарақалпақстан Вести Каракалпакстана 16:18:35, 23.08.2019
Хош келипсиз! | RSS
Сайт мазмуны

Кириў усылы

ЖАСЛАРДЫ БИР МАҚСЕТКЕ ЖӘМЛЕЎШИ ИЛАЖ

Өзбекистан Республикасы мәмлекетлик ғәрезсизлигиниң жигирма бес жыллығы  мүнәсибети менен елимиз бойлап «Биз кеше ким едик, бүгин ким болдық, ертең қандай жоқары шеклерди ийе­леўимиз керек?» темасындағы үгит-нәсият илажлары болып өтпекте.

СҮЎРЕТТЕ: илаждан көринис.

Б.Султамуратовтың түсирген сүўрети.

Өзбекистан Республикасы Мәденият ҳәм спорт ислери министрлигиниң басламасы менен Жоқары ҳәм орта арнаўлы билимлендириў, Халық билимлендириў министрликлери, Орта арнаўлы кәсиплик билимлендириў орайы, республика Руўхый үгит-нәсият орайы, «Өзбеккино» миллий агентлиги, «Өзбекнаво» эстрада бирлеспеси, «Өзбектеатр» дөретиўшилик-өндирислик бирлеспеси, Өзбекистан Жазыўшылар аўқамы, Жаслар мәденият ҳәм көркем өнер орайы менен биргеликте шөлкемлестирилген илаждың тийкарғы мақсети — оқыўшы ҳәм студент-жасларды улыўмаинсаныйлық ҳәм миллий қәдириятлар, жоқары инсаныйлық пазыйлетлер руўхында тәрбиялаў, олардың сана-сезимин түрли идеологиялық, руўхый ҳәм мәлимлеме қәўпинен исенимли қорғаў менен бирге, идеялық иммунитет, белсенди пуқаралық позицияны қәлиплестириўден ибарат.

Бул илажларда қатнасыў ушын пайтахтымыз Ташкент қаласынан келген  белгили театр ҳәм кино актёрлары, эстрада қосықшылары, жазыўшы-шайырлар, илимпазлар, руўхый-ағартыўшылық үгит-нәсият топары ағзалары 16-октябрь күни Нөкис аэропортында салтанатлы жағдайда күтип алынды.

— Бизди жыллы-жүзлилик пенен күтип алғаны ушын миннетдаршылық билдиремен,-дейди «Өзбекфильм» киностудиясының актрисасы, «Шуҳрат» медалының ийеси Наргиза Абдуллаева. — Қарақалпақстанда биринши мәрте болыўым, соның өзинде жақсы тәсир қалдырмақта. Әлбетте, үгит-нәсият илажлары жоқары дәрежеде өтетуғынына исенемен ҳәм оған өз үлесимди қосып атырғанымнан қуўанышлыман...

17-октябрь күни пайтахтымыздағы Жаслар орайында үгит-нәсият илажларының басланыўы мүнәсибети менен баспасөз конференциясы болып өтти. Онда Қарақалпақстан Республикасы Министрлер Кеңеси Баслығының орынбасары М.Алеўов, Өзбекистан Республикасы Мәденият ҳәм спорт ислери министрлигиниң басқарма баслығы   Ж.Узақов, Қарақалпақстан Республикасы Мәденият ҳәм спорт ислери министри М.Айтниязовлар шығып сөйлеп, өткерилип атырған илаждың мақсет ҳәм ўазыйпаларына тоқтап өтти.

Атап өтилгениндей, елимиз ғәрезсизлигиниң жигирма бес жыллығы  мүнәсибети менен  «Биз кеше ким едик, бүгин ким болдық, ертең қандай жоқары шеклерди ийелеўимиз керек?» темасындағы үгит-нәсият илажлары  елимиздиң барлық ўәлаятларында болып өтти. Бул илаж Қарақалпақстан Республикасында  22-октябрьге шекем даўам етип, руўхый-ағартыўшылық үгит-нәсият топары ағзалары тәрепинен жоқары оқыў орынларында, кәсип-өнер колледжлери менен академиялық лицейлерде, улыўма билим бериў мектеплеринде ушырасыўлар өткериледи. Бунда ғәрезсизлик жылларында түрли салаларда, соның ишинде билимлендириў тараўында ерисилген табыслар, қала ҳәм район орайларында, шетки аўылларымызда алып барылып атырған қурылыс ҳәм абаданластырыў жумыслары, елимизде ҳүким сүрип тур­ған тынышлық ҳәм турақлылық, миллий армиямыздың қорғаныў қүдиретин беккемлеў бағдарында әмелге асырылған кең көлемли реформалар, елимиздиң Биринши Президенти И.Кәримовтың басламасы менен жаслар ушын жаратылған шараятлар кең түрде сөз етилип, айырым мәмлекетлерде жүз берип атырған қанлы урысларды, бийгүна инсанлардың, ең ашынарлысы, аналар менен балалардың өлимине себепши болған диний-экстремистлик ҳәрекетлердиң, олардың артында турған күшлердиң тынышлықты бузыўшы мақсетлерин қаралаўшы қысқа метражлы фильмлер менен слайд-шоулар көрсетиледи.

Усы күнниң өзинде руўхый-ағартыўшылық үгит-нәсият топары ағзалары Нөкис, Кегейли ҳәм Хожели районларына жөнеп кетти.

Нөкис районы. Нөкис районында бир қатар кәсип-өнер колледжлери менен улыўма билим бериў мектеплеринде өткерилген ушырасыўларда Өзбекис­танда хызмет көрсеткен артистлер Меҳмонали Салимов, Александр Бекчанов, «Инсон ва қонун» газетасының бас редакторы, шайыр Қошқар Нарқабыл, Қарақалпақстан Жазыўшылар аўқамының баслығы К.Каримов, Өзбекистан халық ша­йыры Ж.Избасқанов, филология илимлериниң докторы Қазақбай Йулдашев, «Ниҳол» сыйлығының лауреаты Хулкар Абдуллаева, Қарақалпақстан Республикасына хызмет көрсеткен артист Ж.Сағындықова ҳәм басқалар шығып сөйлеп, ғәрезсизликке шекемги болған дәўир ҳәм ғәрезсизлик жылларындағы түпкиликли өзгерислер, халқымыздың турмыс шараятын жақсылаў, жасларымызды ҳеш кимнен кем емес  ҳәм кем болмайтуғын дәрежеде тәрбиялаў, миллетлер арасындағы дослық ҳәм татыўлықты сақлаў бойынша әмелге асырылып атырған кең көлемли жумысларды айқын мысаллар менен атап өтти. Ҳақыйқатында да, Өзбекистан көп миллетли мәмлекет. Бүгинги күни елимизде 130 дан аслам миллет ҳәм халық ўәкиллери бир мақсет жолында беккем аўызбиршиликте жасап келмекте. Елимиз Конс­титуциясының  8-статьясында белгилеп қойылғанындай, «Өзбекистан халқын, миллетине қарамастан, Өзбекистан Республикасының пуқаралары қурайды».

Өз гезегинде ушырасыўларда халықаралық таңлаўлардың жеңимпазлары, елимиз көлеминде, соның менен бирге шет еллерде өткерилген спорт жарысларының жеңимпазлары болған оқыўшы жаслар шығып сөйлеп, өзлерине жаратылған шараятлар ушын миннетдаршылық билдирди.

— Биз жаслардың ҳәр тәреплеме жетик, бәркамал инсан болып жетилисиўимиз ушын елимизде барлық мүмкиншиликлер жаратылған,-дейди Шортанбай аўыл хожалығы кәсип-өнер колледжиниң оқыўшысы Нурсулыў Сағындықова. — Өзимниң мысалында айтатуғын болсам, «Кекселерди қәдирлеў жылы»нда болып өткен «Мәҳәллемиздиң ең азада қызлары» таңлаўының Өзбекистан Республикасы бас­қышында жеңимпаз болдым. Колледжимизде қәбилетли оқыўшылар көпшиликти қурайды. Гөззал ҳәм бийтәкирар елимиздиң айдын келешегине үлес қосыў ҳәр бир жас әўладтың әдиўли ўазыйпасы болып табылады.

Хожели районы. Хожели районына  барған илаж қатнасыўшылары топарларға бөлинип,  райондағы мектеплерде, колледж ҳәм лицейлерде  оқыўшы жаслар менен ушырасты. Ғәрезсизликтен бурынғы халықтың жасаў жағдайы ҳәм ғәрезсизлик жылларындағы жетискенликлер, атап айтқанда, билимлендириў тараўында ерисилген табыслар, тараўларда әмелге асырылған реформалар, елимизде тынышлықты сақлаў ушын алып барылып атырған илажлар ҳаққында кең түрде сөз етти. Сондай-ақ, дүньяның көплеген мәмлекетлеринде болып атыр­ған урыс-жәнжеллер, диний экс­тремизм ҳәм терроршылық ҳәрекетлериниң  ақыбетлери ҳәм бундай иллетлерге қарсы гүресиў илажлары ҳаққында өз пикир-усынысларын билдирди. Оқыў орынларында ғәрезсизлик  жыллардағы ерискен табыслар ҳаққында көргизбелер шөлкемлестирилип, қысқа метражлы фильмлер қойып берилди ҳәм слайд-шоулар инам етилди.

— Бизлердиң балалық жылларымыз бундай дәрежеде өтпеди. Ҳәзир балаларымызға, жасларымызға билим аламан, спорт пенен шуғылланаман десе барлық шараятлар жаратылған. Бурынғы аўқам ўақтында шет еллерге барғанымызда Өзбекистандай мәмлекеттиң бар екенлигин көпшилик халықлар билмес еди. Мине, енди ғәрезсизлик себепли елимизди дүнья таныды. Байрағымыз спортшылардың табыслары менен көклерде желбиремекте. Ең тийкарғысы, биз өзлигимизди аңладық, бүгин көкирегимизди керип табысларымыз бенен мақтанып жүретуғын ғәрезсиз елдиң бахытлы инсанларына айландық,-дейди Өзбекистан­ға хызмет көрсеткен артист   Саида Раметова.

Қатнасыўшылар жаслар менен ушырасып, олар менен пикирлесер екен, 60-санлы мектепте көкиреклеринде медальлары жарқыраған, бир шаңарақтан шыққан төрт спортшы, еркин гүрес бойынша чемпионлар Хуршида, Жаҳонгир, Жаҳонай ҳәм Мангуберди  Қасымовлардың табысларына, сондай-ақ, «Билимлер беллесиўи»ниң Өзбекистан көлеминде өткерилген басқышында еки жыл қатарына үшинши орынды ийелеген 69-санлы мектептиң 9-класс оқыўшысы Айжамал Қадырованың шет тилинде сөйлеўине ҳәўес пенен қарады. Медицина колледжиниң оқыўшысы Юлдуз Қурбаниязованың жақында Ташкент қаласында өткерилген «Азада қызлар» таңлаўында команда қурамында биринши орынды алып келиўи, әсиресе, «Меҳрибанлық үйи»ниң тәрбияланыўшысы  Рано Карамованың «Камалак жулдызлары» таңлаўында номинация жеңимпазы болып, Ташкент қаласына жоллама алыўы ғәрезсизлик жаратып берген шексиз имканиятлардың нәтийжеси саналады. Илаж қатнасыўшылары  олардың талант ҳәм билим дәрежесине жоқары баҳа берди.

Районда болып өткен илажларға Өзбекистан халық артисти Азиза Бегматова, Өзбекистан­ға хызмет көрсеткен артист Тур­ғун Бекназаров, Өзбекистанға хызмет көрсеткен артист, эстрада қосықшысы Сардор Рахимхон, Өзбекистан Жазыўшылар аўқамы баслығының орынбасары  Ғофур Эшмуродов, шайыра Зульфия Муминова, «Ниҳол» сыйлығының лауреатлары Мадинабону Мусаева ҳәм Гүлназ Өтеповалар, Республикалық «Қуўыршақ театры»ның баслығы Полат Айтмуратов, жазыўшы Сағындық Ембергенов, белгили қосықшы Гаўхар Саитова  ҳәм басқалар қатнасты.

Илаж соңында қатнасыўшылар «Меҳрибанлық үйи»нде болып, балалар менен ушырасып, олардың жасаў шараятлары ҳәм бул жерде жаратылған шараятлар менен жақыннан танысты ҳәм ушырасыў кешесинде балаларға ҳүкиметимиз тәрепинен жаратылып атырған ғамқорлықлар ҳаққында айтып өтти. Қатнасыўшыларға «Меҳрибанлық үйи» тәрбияланыўшыларынан дүзилген  «Таң ғумшалары» ансамблиниң концерт бағдарламасы қойып берилди.

Улыўма Нөкис, Кегейли ҳәм Хожели районларында усы темадағы ушырасыў 15 улыўма билим бериў мектебинде, 15 кәсип-өнер колледжинде ҳәм «Меҳрибанлық үйи»нде болып өтип, онда  12 мыңнан аслам оқыўшы жаслар менен тәрбияланыўшылар қатнасты.

Шымбай районы. 18-октябрь күни «Биз кеше ким едик, бүгин ким болдық, ертең қандай жоқары шеклерди ийелеўимиз керек?» темасындағы үгит-нәсият илажлары қатнасыўшыларының бир топарын әййемги  бес қаланың бири саналған Шымбай районының халқы да жыллы жүзлилик жағдайында, саз-сәўбет, нан-дуз ҳәм гүл дәстелери менен күтип алды.

Өзбекистанда ҳәм Қарақалпақстанда белгили театр ҳәм кино актёрлары, эстрада атқарыўшылары, жазыўшы-шайырлар, мәденият ҳәм көркем-өнер тараўының белсендилеринен дүзилген топарлар райондағы 5, 32, 36, 38, 40-санлы улыўма билим бериў мектеплеринде, Шымбай қурылыс ҳәм сервис, аўыл хожалығы, педагогика кәсип-өнер колледжлеринде, 8-санлы Балалар музыка ҳәм көркем-өнер мектебинде, Әжинияз атындағы Нөкис мәмлекетлик педагогикалық институты жанындағы 4-санлы академиялық лицейде болып, оқыўшы жаслар менен ушырасты.

Илажларда оқыўшы жасларға ғәрезсизлик дәўиринде елимиздиң халық хожалығы тараўларында ерисилген жетискенликлер, жасларға жаратылып берилген кең мүмкиншиликлер, көркем-өнер, мәденият ҳәм спорт тараўларында қолға киргизилген табыслар, ғәрезсизлик идеялары ҳәм жас­лар­ға байланыслы жаслар сиясаты, айырым қоңсылас республикаларда  жүз берип атырған жат иллетлер ҳәм оның унамсыз ақыбетлери ҳаққында видеофильм көрсетилди.

Ушырасыўларда Өзбекистан­ға хызмет көрсеткен артистлер Эгамберди Рахимов, Бахадыр Нышанов, Шохида Исмайилова, театр артистлери Феруза Бабаярова, Нурмет Маматов, эстрада атқарыўшылары Шахриёр, Жаноб Расул, Улуғбек Холиқов, сондай-ақ, «Афруз», «Садо» топарлары, Бердақ атындағы Қарақалпақ мәмлекетлик сазлы театрының артистлери Ғайрат Саитов, Клара Шамуратова, Гүлсара Жуманиязова, жазыўшы-ша­йырлар  Алпысбай Султанов, Әбилқасым Өтепбергенов, Яқыпбай Әжимов, Түркменбай Жийемуратов, Гүлнара Нурлепесова, Гүлистан Дәўлетова, белгили қосықшылар Гүлхатийша Айымбетова, Дәлибай Мәмбетмуратов ҳәм басқалар шығып сөйлеп, өткерилип атырған илажлардың мақсети, жаслардың сана-сезимине көрсететуғын унамлы тәсири ҳәм өзлериниң дөретиўшилик мийнетлери ҳаққында айтып берди. Оқыўшыларды қызықтырған сораўларға жуўап қайтарды.

Оқыў орынларында болып өткен илажлар концерт бағдарламасы менен жуўмақланды.

Үгит-нәсият илажлары даўам етпекте.

Д.АБИБУЛЛАЕВ, Г.ТУРДЫШОВА, Н.РЕЙПНАЗАРОВ,

Қарақалпақстан хабар агентлигиниң хабаршылары.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF