Еркин Қарақалпақстан Вести Каракалпакстана 21:27:37, 18.10.2019
Хош келипсиз! | RSS
Сайт мазмуны

Кириў усылы

ШЫҒАРМАЛАРЫ — ЖОЛ КӨРСЕТИЎШИ ЖУЛДЫЗ

Ғәрезсиз мәмлекетимиздиң Биринши Президенти Ислам Кәримов тирилигинде-ақ өзине мәңги естелик орнатып кеткен заманымыздың уллы шахсларының бири болды. Оның ғәрезсизлигимиздиң әҳмийети ҳәм мазмун-мағанасы, турмысымыздың түрли тараўлары, оларды раўажландырыў ҳаққында жазылған, терең философиялық пикирлер менен суўғарылған шығармалары халқымыз ушын әсирлер даўамында жол көрсетиўши жулдыз болатуғынына гүман жоқ.

И.Кәримовтың «Өзбекистан XXI әсир босағасында: қәўипсизликке қәўип, турақлылық шәртлери ҳәм раўажланыў кепилликлери» атлы китабындағы «Дин адамларда исеним туйғысын беккемлеген, оларды пәклеп, раўажландырып бар­ған. Турмыс сынақларын, машқала ҳәм қыйыншылықларды жеңип өтиўинде күш бағышлаған. Улыўмаинсаный ҳәм руўхый қәдириятларды сақлап қалыўда ҳәм әўладтан-әўлад­қа жеткериўде жәрдем берип келген. Айырым ўақытларда болса буның бирден-бир шарасы болған. Бундай жуўмақ шығарыўға ата-бабаларымыздың дини болған ислам дини мысалында айтыў ушын ҳәмме тийкарларға ийе­миз. Соның ушын да дин инсанның исенимли жолдасы, адамзат өмириниң бир бөлеги болып келмекте» деген қатарларды оқығаннан ке­йин мениң ислам динине бол­ған пикирлерим және де айқынлас­ты.

1999-жылы «Өзбекистон» баспасында жарық көрген «Алла қәлбимизде, жүрегимизде» атлы китабында болса И.Кәримов былай деп көрсетеди: «Соны айтпақшыман, биз өз миллетимизди мине усы муқаддес диннен ажыратқан түрде ҳасла көз алдымызға келтире алмаймыз. Диний қәдириятлар, исламый түсиниклер турмысымызға сол дәрежеде сиңип кеткен, оларсыз биз өзлигимизди жоғалтамыз. Мейли жас болсын, мейли кексе болсын, ҳәр бир өзбек не нәрсеге мүнәсибет билдирсе де, әлбетте, оны бийықтыяр Жаратқанның аты менен байланыстырады. Ҳәр бир сөзимизди, исимизди «бисмилла» айтып баслаймыз, жақсы-жаман күнлеримизде қудайға шүкирлик келтиремиз, тәўбе етемиз. Халқымыздың мың жыллық тарийхын, бүгинги руўхый турмысын, дин ҳәм диянатымызды қысқаша сүўретлеп айтыў мүмкин, Алла бизиң қәлбимизде, жүрегимизде».

Биринши Президентимиздиң бул китапларын оқығаннан соң менде динимизге болған қызығыўшылық бурынғыдан да бетер күшейди. Илгериде студент­лик пайытымда араб жазыўы ҳәм оқыўын аз-маз үйренген едим. Кейин ала Қураны Кәрим, ҳәдислер ҳәм пай­ғамбарымыз Муҳаммед алайҳиссаламның өмири туўралы көплеген китаплар оқыдым. Имам ийшан, Сәлмен ийшан, жақында болса Нурымбет ахун ҳаққындағы китапларым баспадан шықты. Шынын айтсам, Сәлмен ийшан ҳаққында жазған китабыма материаллар жыйнаў әдеўир қыйын кешти. Шымбай ра­йонында жасаўшы, халқымыздың белгили уламасы Әбдиразақ ахунның улы ҳажы Әбиўбәкир мақсымға бардым. Ол маған Сәлмен ийшан ҳаққында бираз мағлыўмат берди. Миннетдаршылық ретинде мен Әбиў­бәкир мақсымға елимиздиң Биринши Президенти    И.Кәримовтың «Алла қәлбимизде, жүрегимизде» атлы китабын саўға еттим. Ол қуўанғанынан: «Сизде және бар ма? Мен бул китапты мешитке, Мардан ата мақбарасына, Ташаўыз мешитиниң имамына бергим келип тур. Мен адамларға «минекей, Президентимиз Алла қәлбимизде, жүрегимизде, деп айтқанда, сизлер не ушын екиленесизлер?» деп, оларға китапты оқытар едим», деди.

Мен бурынырақта бул китаптан көбирек алып, досларыма, өзиме жақын адамларға саўға еткен едим. Нөкистеги Муҳаммад ибн Аҳмад ал-Беруний орта арнаўлы ислам билим журтында оқып атырған баласынан Әбиўбәкир мақсымға он дана китап берип жибердим.

Соны айрықша атап өтиў керек, елимиздиң Биринши Президенти Ислам Кәримов миллий қәдириятларымызды, салт-дәстүрлеримизди, солар менен бир қатарда диний мийрасларымызды да қайта тиклеўде пидайылық көрсетти. Оның басламасы менен ислам дүньясының көрнекли ўәкиллери бол­ған уллы жерлеслеримиз Имам Бухарий, Имам ат-Термизий, Баҳаўатдин Нақшбандий, Султан Ўәйис баба, Имам ийшан, Сәлмен ийшан сыяқлы бир неше онлаған уламаларымыздың исмлери қайта тикленип, мақбаралары абаданластырылды. Елимизде Ташкент Ислам университети ҳәм қаншадан-қанша мешит-медреселер қурылып, иске түсирилди. Ата-бабаларымызды еске түсириў күни белгиленди. Мусылман халықларының муқаддес сәнелери бол­ған Қурбан ҳайты ҳәм Рамазан ҳайты байрамларына айрықша итибар берилип, бул күнлер демалыс күнлери деп жәрияланды. Ҳүкиметимиз жаратқан жеңилликлерден пайдаланып, жыл сайын қаншадан-қанша журтласларымыз мүбәрек Ҳаж сапарына барып келмекте.

Мине, булардың барлығы И.Кәримовтың елимиз пуқараларының дин ҳәм ҳүждан еркинлигин тәми­йинлеўдеги айрықша хызметлери болды. «Таў алыслаған сайын бәлент» дегениндей, ол кисиниң ҳәр бир айтқан нәсиятлары, жазған шығармалары ғәрезсиз мәмлекетимиздиң раўажланыўы жолында тийкарғы бағдар болып қала береди.

Алламберген ДӘЎЛЕТМУРАТОВ,

Нөкис қаласы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF