Еркин Қарақалпақстан Вести Каракалпакстана 20:53:30, 18.10.2019
Хош келипсиз! | RSS
Сайт мазмуны

Кириў усылы

ӨЗБЕКИСТАНЛЫ ПАРАЛИМПИАДАШЫЛАР КҮШЛИЛЕР ҚАТАРЫНДА

Көпшиликтиң хабары болса, усы күнлерде Бразилияның Рио-де-Жанейро қаласында XV Паралимпиада ойын­лары өткерилмекте. 7-сентябрь күни басланып, ертең жуўмақланатуғын бул ойынларда дүньяның 176 мәмлекетинен 4350 спортшы қатнасып, спорттың 22 түри бо­йынша 528 медальлар ком­плекти ушын гүрес жүргизбекте.

Қуўанарлы тәрепи, быйыл­ғы Паралимпиадада Ўатанымыз спортшылары жоқары нәтийжелерди көрсетпекте.

Рио-де-Жанейроға 31 спортшы менен жол алған Өзбекистан делегациясы усы күнге шекем 7 алтын, 6 гүмис ҳәм 17 қола (жәми 30) медальды қолға киргизип, рәсмий емес улыўма командалық есапта 13-орында киятыр. Командамыздың бул табысына дзюдошыларымыз, жеңил атлетлеримиз ҳәм жүзиўшилеримиз салмақлы үлес қосты.

Әсиресе, Өзбекистанлы дзюдошылардың көрсеткишлерин айрықша атап өтсек арзыйды. Ер палўанларымыздан Шерзод Намазов (-60 кг.), Өткир Нигматов    (-66 кг.) ҳәм Әдил Тулендибаев (+100 кг.) алтын, Шухрат Бабаев (-90 кг.), Ши­йирин Шарипов (-100 кг.) гүмис, қызларымыздан Ҳайтжан Алимова (+70 кг.),  Севинч Салаева (-52 кг.) ҳәм Гүлрух Рахимова (-70 кг.) қола медальларды қолға киргизип, дзюдо бойынша мәмлекетимиздиң биринши орынды ийелеўин тәми­йинледи.

Сондай-ақ, жеңил атлетикашы Хуснитдин Нарбеков диск ылақтырыўда жәҳән рекордын орнатып, чемпион атанған болса, ядро ылақтырыўда қола медальды жеңип алды. Данияр Салиев болса узынлыққа секириўде сыйлы үшинши орынды ийеледи. Жүзиўшилеримизден Фирдавс Мусабеков, Кирилл Паньков, Музаффар Турсынхожаев, Фатимахан Амилова, Шахсәнем Ташпулатовалардың көрсеткен нәтийжелери де дыққатқа ылайық.

Жуўмақлаўшы күн алдынан улыўма командалық есапта қытайлы паралимпиадашылар (84 алтын, 66 гүмис, 41 қола ­ жәми 1o1 медаль) биринши орында киятырған болса, екинши ҳәм үшинши орынларды тийислисинше Уллыбритания (49, 28, 31 ­ 108) ҳәм Украина (35, 27, 30 ­ 92) ийелеп тур.

Таярлаған: С.ЖАНИЕВ.

СҮЎРЕТТЕ: Паралимпиада жеңимпазы Әдил Тулендибаев (екинши) сыйлықлаў мәресиминен соң.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF