Еркин Қарақалпақстан Вести Каракалпакстана 20:40:05, 09.12.2019
Хош келипсиз! | RSS
Сайт мазмуны

Кириў усылы

ИСТИҢ КӨЗИН БИЛИП...

Ғәрезсизлик жылларында ўатанлас­ларымыздың исбилерменликке қызығыўшылығы бурын көрилмеген дәрежеде артып бармақта. Бүгинги күнде олардың ерисип атырған жетискенликлерине нәзер тасласақ, мәмлекетимиз таўсылмас байлықлар кәни, тек жаңа ис баслар алдында өз имканиятларыңды жети өлшеп бир кесип, жигер менен мийнет етиў керек екенлигин терең уғынғандай боласаң. Буны берунийли жас исбилермен Үмит Ғапбаровтың мысалында айқын көриўге болады.

Ол басшылық етип атырған қәнигелескен «Бунёдбек парранда» фермер хожалығының сегиз жумысшыдан ибарат жәмәәти 3 жыл бурын қусшылықты таңлаған. Олар он мың бас таўық бағыўға болатуғын үлкен имарат қурып, қуўатлылығы жоқары инкубатор агрегатын сатып алды. Мине соннан бери жәмәәт таўық өсириў менен бирге инкубаторға мәйек қойып халыққа таўық шөжелерин де жеткерип бермекте. Ҳәр жылы бәҳәрде ҳәм жазда 4-5 мәртебе шөже шығарылады ҳәм олар үш айлық болып дән, жем жейтуғын дәрежеге жеткенше бағып, соң базарға шығарады. Тийкарғы таўықханада удайы 10 мың бас таўық бағылады ҳәм мәйек жетистириледи.

— Мен инкубаторға бастырыў ушын мәйеклерди Самарқандтан алып келемен,-дейди фермер хожалығының баслығы Үмит Ғапбаров. — Ҳәзир менде үш айлық 16 мың бас шөжелер бар. Бурын бизиң шаңарағымыз тек дийқаншылық пенен шуғылланар едик. Солай да болса тәўекел еттик. Мине, нәтийжелеримиз жаман емес. Жылына 20-30 миллион сум, базы ўақытлары 40-50 млн сум нақ пайда алынады. Мениң билиўимше, таўықлардың күтимине айырықша итибар менен қарап, жуғымлы жем менен тәрбиясын берсең халыққа қус гөши ҳәм мәйек жетистириўди қанша көбейтемен десең сонша имканиятлар бар екен.

Биз усап көп етип таўық бағыўды кәсип ететуғынлар жемди өзлери жетистириўи керек. Сонда өнимниң өзине түсер баҳасы арзанлайды ҳәм жәмәәтке пайда аўысады. Сол ушын биз де 70 гектар егислик жеримизге түрли дәнли дақыллар егип арзан жем таярлаймыз. Ҳәзирше нәтийжелеримиз жақсы, лекин, биз ерисилген нәтийжелер менен шекленбеймиз. Себеби, айланыста пулы бар исбилермен барлық ўақытта әжайып жетискенликлерди қолға киргизиўге тәўекел етиўине болады.

Е.ҚӘДЕНОВ, Беруний районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF