Еркин Қарақалпақстан Вести Каракалпакстана 20:53:07, 18.10.2019
Хош келипсиз! | RSS
Сайт мазмуны

Кириў усылы

ҲАЯЛ-ҚЫЗЛАР БЕЛСЕНДИЛИГИН АРТТЫРЫЎҒА БАҒЫШЛАНДЫ

Ҳәзирги ўақытта жәми­йетимизде ҳаял-қызлардың тутқан орнын ҳәм жәмийетлик-сиясий белсендилигин асырыў, ҳәм олардың арасында саламат турмыс тәризин үгит-нәсиятлаў сыяқлы әҳмийетли ўазыйпалар Өзбекистан «Миллий тикланиш» демократиялық партиясының дәстүрий мақсет-ўазыйпаларында өз сәўлелениўин тапқан. Бул бойынша партия «Ҳаял-қызлар қанаты» басламасы менен шөлкемлестирилип атырған илажлар ҳаял-қызлардың  ҳуқықый ҳәм кәсип көнликпелерин беккемлеў, сиясий  билим ҳәм мәдениятын және де асырыў, интеллектуал потенциалға  ийе ҳаял-қызларды хошаметлеўге қаратыл­ғаны менен әҳмийетке ийе.

Ғәрезсизликке ерискенимизден соң мәмлекетимизде әмелге  асырылып атырған кең көлемли реформалар процесин, яғный, күшли пуқаралық жәмийетти ҳәм ҳуқықый демократиялық мәмлекет  қурыўды ҳаял-қызларымыздың қатнасыўысыз көз алдымызға  келтире алмаймыз. Өткен жыллар даўамында мәмлекетимизде избе-излик пенен әмелге асырылып атырған реформалар нәтийжесин бүгинги пәраўан турмысымызда, қала ҳәм аўылларымыздың көркем келбетинде, жасы үлкен ҳәм жасы кишиге болған итибарда, ҳаял-қызларға көрсетилип атырған айрықша ҳүрметте көриўимизге болады. Бул ғәрезсизлигимиздиң дәслепки күнлеринен-ақ, елимизде аналықты ҳәм балалықты қорғаў, саламат шаңарақты қәлиплестириў мәм­лекетлик сиясаттың баслы бағдары  болды.

 

Жақында Өзбекистан «Миллий тикланиш» демо­кратиялық  партиясы «Ҳаял-қызлар қанаты» тәрепинен Өзбекистан  Республикасы ғәрезсизлигиниң 25 жыллығы мүнәсибети менен «Гөззал ҳәм бийтәкирарымсаң, муқаддес ?атаным, жаным саған пидә, Өзбе­кистанымS» ураны астында Ҳаял-қызлар форумы өткерилди. Форумды ӨзМТДП Қарақалпақстан Республикасы  Кеңеси  баслығы  Т.Романов  ашты. Оның атап өткениндей, партияға ағза болған ҳаял-қызлардың сиясий белсендилигин арттырыў ҳәм оларды  елимиздиң раўажланыўы жолында бирлесип мийнет етиўге шақырыў мақсетинде ҳәр жылы ҳәр түрли атамаларда илажлар, семинарлар, форумлар, таңлаўлар өткерип келмекте. Ҳәр тәреплеме шеберлигин, билимлилигин көрсете билген, көркем-өнер тараўында, миллий липаслар ҳәм де миллий өнерментшиликти раўажландырыў бойынша бир қатар жетискенликлерге ерискен қызларымызды еле де қоллап-қуўатлаў, керекли шараятларды жаратып бериў ҳәм де оларды хошаметлеў партияның тий­карғы мақсетлериниң бири есапланады.

Ҳәзирги күнде  көплеген  ҳаял-қызларымыз «Өзбе­кистан  Қаҳарманы» деген жоқары атаққа ерисип, қаншадан-қанша қызларымыз Зульфия атындағы мәмлекетлик сыйлықтың лауреатлары болып атырғанлығы, әсиресе, қызларымыз спорт тараўында мисли көрилмеген жетискенликлерге ерисип, жәҳән ареналарында мәмлекетимиз байрағын желбиретип, елимиздиң  даң­қын көклерге көтерип атыр.

Форум даўамында түрли тараўларда жетискенликлерге ерискен  жаслар партия қатарына қабыл етилип, оларға партияға ағзалық гүўалықлары ҳәм де бир қатар номинацияларда жеңимпаз болған  жас қызларымыз диплом ҳәм естелик саўғалары менен сыйлықланды. Сондай-ақ, «Ҳаял-қызлар қанаты»ның бир қатар белсендилери де ҳүрмет жарлықлары менен  сыйлықланды.

З.ЖАҚСЫМУРАТОВА.

СҮЎРЕТТЕ: Бир топар илаж қатнасыўшылары. Ш.Сипатдиновтың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF