Еркин Қарақалпақстан Вести Каракалпакстана 21:32:01, 18.10.2019
Хош келипсиз! | RSS
Сайт мазмуны

Кириў усылы

ЕЛИМИЗДИ ЖӘҲӘНГЕ ТАНЫТҚАН ЕДИ

2016-жылы 2-сентябрь күни дүньяға белгили сиясий ғайраткерлердиң бири, ғәрезсиз Өзбекистан Республикасының Биринши Президенти Ислам Абдуғаниевич Кәримовтың дүньядан өткенин еситкен елимиздиң ҳәр пуқарасының төбесинен муздай суў қуйғандай болғаны сыр емес. Ол тек халқымыздың ғана емес, ал, пүткил прогрессив адамзаттың қәдирли ҳәм ҳүрметли азаматы еди.

Ол қызыл империяның езиўшилик сиясаты ҳүким сүрип турған аласапыранлы дәўирде ҳеш қандай қан төгиспесиз халқымыздың әсирлер даўамында аңсап келген ғәрезсизлигин, еркинлигин алып берди.

И.Кәримовтың мәмлекетимизди даналық пенен басқарыўы нәтийжесинде Өзбекистан 25 жыл ишинде бурынғы қалақ үлкеден раўажлан­ған индустриал елге айланды. Дүньяда экономикасы тез пәт пенен раўажланып атырған бес мәмлекеттиң қатарына кирди. Халқымыздың турмыс дәрежеси ғәрезсизлик жылларында дерлик 10 есеге артты.

Ислам Абдуғаниевичтиң «биз ҳеш кимнен кем емеспиз, ҳеш кимнен кем болмаймыз да» деген сөзлери пуқараларымызды жигерлендирди. Ол дүнья цивилизациясының раўажланыўына бийбаҳа үлес қос­қан данышпанлардың әўладлары екенимизди ҳәр биримиздиң санамызға сиңдирип, бизди үлкен жеңислерге баслады. Бурын аяқ асты болған тарийхымызды, муқаддес динимизди, үрп-әдетлеримизди, өзлигимизди тиклеп, оларды халық хызметине жаратты. Журтбасшымыздың даналығы нәтийжесинде Өзбекистан жәҳән жәмийетшилигинде өзиниң орнына ийе болып, дүньялық мәселелерди шешиўге араласа баслады. Жер жүзинде парахатшылықты сақлаўда оның пидайылығын дүнья тән алды.

Елимиздиң Биринши Президенти өзиниң халқын жанындай жақсы көрер еди. Әсиресе, келешегимиз ийелери болған жасларға деген меҳири, ғам­қорлығы айрықша болды. Жаслар ушын дүнья тәлим стандартларына туўра келетуғын Кадрлар таярлаўдың миллий бағдарламасын ислеп шықты. Тиккелей оның басламасы ҳәм қоллап-қуўатлаўы менен мәмлекетимизде шет еллердеги абырайлы жоқары оқыў орынларының филиаллары ашылды.

И.Кәримовтың Қарақалпақ­станға болған меҳири де айрықша еди. Ол буннан 25 жыл бурын Арал апатшылығының нәтийжесинде әдеўир албыраған, ертеңги күнине исеними қалмаған қарақалпақ халқын үмитлендирди ҳәм келешекке баслады. Оның «Қарақалпақстан үлкесиниң келешеги айдын болатуғынына исенемен. Қарақалпақ халқы басқа халықлар қатары өз алдына қойған мақсетлерине әлбетте, ериседи» деген сөзлери хал­қымызға мәдет, күш-қуўат берди.

Ислам Абдуғаниевич Өзбекистанның биринши басшысы болып сайланыўдан-ақ, 1990-жылы Қарақалпақ­станға келип, Мойнақ районының тур­ғынлары менен ушырасты. Оның ақылына, ғамқорлығына, меҳрибанлығына ҳәм табанлылығына ырза бол­ған халқымыз «Исламжан сирә қарақалпақ болса керек» деп марапатлады.

Ҳақыйқатында да, И.Кәримов Қарақалпақстандағы экологиялық апатшылықтың тәсирин пәсейтиўге бел байлады. Оның интасы менен 1992-жылы Нөкис қаласында Арал мәселеси бойынша халықаралық илимий конференция шөлкемлестирилип, соның тийкарында Өзбекистан Республикасы Министрлер Кабинетиниң қарары менен алыстағы аўылларға суў алып барыў, тәбий­ғый газ бенен тәми­йинлеў ислери белгиленди. 240 километр узынлықтағы Түйемойын — Нөкис, 112  километр узынлықтағы Нөкис — Тахтакөпир суў жеткериў тармақлары қурылды. 390 елатқа суў жеткерилди.

И.Кәримов бир неше мәрте дүньяның абырайлы шөлкемлеринде, соның ишинде Бирлескен Миллетлер Шөлкеминиң минберинде Аралды қутқарыў мәселеси бойынша шығып сөйледи ҳәм оған жәҳән жәмийетшилигиниң дыққатын қаратты.2010-жылы БМШ минберинде Арал апатшылығы мәселесин және бир мәрте көтерип, оның бас хаткери Пан Ги Мунның Қарақалпақстанға келиўине еристи. Пан Ги Мунның Қарақалпақстанға келип, мәселени үйрениўи тийкарында БМШ қурамындағы бес шөлкем айрықша бағдарлама дүзип, Қарақалпақстанға жәрдемди күшейтти.

Сол сапары БМШ сессиясында сөйлеген сөзинен кейин И.Кәримов Қарақалпақстанға келгенде: «БМШ ниң үлкен минберинде пүткил дүнья нәзеринде турып, Арал мәселеси бо­йынша сөйлегенимде, Сизлер, қарақалпақлар көз алдымда турдыңыз. Сизлерди еследим, себеби, Арал ушын гүрес Қарақалпақстан ушын гүрес, қарақалпақ миллети ушын гүрес, керек болса, ол ушын жанымды бериўге таярман», деген сөзи оның Қарақалпақстанға деген азаматлығы, жақсылығы ҳәм меҳрибанлығы еди.

Ислам Кәримов Орайлық Азияда ең күшли мәмлекетти дүзип, Әмир Темур бабамыз сыяқлы елимиздиң даңқын дүньяға таратты. Әмир Темурдың «Күш — әдалатлықта» деген даналығына «Күш — әдалатлықта, билимде, ой-пикирде» деген даналықты қосып, оны көрегенлик пенен әмелге асырды. Оның усындай хызметлерин жәҳән мо­йынлап, исми тарийх сахнасында Әмир Темур менен қатар қойылатуғынына исенемен.

Халқымыз ушын қәдирли бол­ған ҳүрметли Ислам Абдуғаниевич Кәримовты еле көп сағынамыз. Сол сағынышта оның жарқын образы ҳәм көрсеткен жолы, усы жолдан аўыспай баратырған халқымыздың табыслары бизге мәдет, қуўат болып, кеўлимизди көтереди.

Ж.БАЗАРБАЕВ, академик.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF