Еркин Қарақалпақстан Вести Каракалпакстана 17:20:56, 23.02.2020
Хош келипсиз! | RSS
Сайт мазмуны

Кириў усылы

САЛАМАТ  НЕКЕНИ  ҚӘЛИПЛЕСТИРЕЙИК


Елимизде ғәрезсизлик ҳүким сүрген 25 жыл ишинде қандай жетискенликлерге еристик, қандай унамлы өзгерислер болды, деген саўал ҳәр бир ўатанласымыздың ой елегинен өтиўи тәбийғый. Әсиресе, елимиздиң Биринши Президенти И.Кәримовтың «Перзентлеримиз бизден көре ақыллы, билимли, дана ҳәм әлбетте бахытлы болыўы керек» деген сөзи ҳәр бир инсанға, ҳәр бир шаңараққа қуўаныш бағышласа, екинши тәрептен перзентлеримизди Журтбасшымыз билдирген исенимге ылайық етип тәрбиялаў ата-аналар ушын үлкен жуўапкершилик. Мине солай екен, ең дәслеп саламат шаңарақты қәлиплестириў — мәмлекетлик сиясат дәрежесине көтерилген мәселе.

Саламат шаңарақта, саламат орталықта тәрбия көрген перзентлеримиздиң, балаларымыздың келешеги уллы. Демек, саламат шаңарақтың қәлиплесиўи шаңарақ қурмақшы болған жаслардың саламат болыўы, шаңарақ қурыўға таяр болыўы менен байланыслы. Бул ўазыйпа ПҲАЖ бөлимлери хызметкерлерине де ти­йисли. Некеден алдын медициналық тексериўден өтиўи арқалы саламат ҳәм беккем шаңарақты қәлиплестириў бирден-бир ўазыйпа болып белгиленди. Тийкарынан неке қурмақшы болған жаслар дәслеп бир-бириниң денсаўлығынан хабардар болып, егер қандай да кеселликлер анықланса бийпул емлениўи ушын жоллама бериледи ҳәм саламатлығын беккемлеўге имканият туўдырылады.

Ойланып қарасақ, бундай имканиятлар басқа мәмлекетлерде бар ма? Олар бийпул емлене ала ма?

Мине, мәмлекетимизде ғәрезсизлик ҳүким сүрген дәслепки жыллардан-ақ бул мәселеге дыққат қаратылды. Бирақ бул имканиятларға айырым ата-аналар, әсиресе, жаслар бийпарқ қарайды. Гейпара жағдайларда турмыс қурып болғаннан кейин некеден өтер ўақытта яки перзент туўылғаннан кейин медициналық тексериўден өтеди. Егер, созылмалы ҳәм жуқпалы кеселликлер анықланса кейни өкинишке алып келетуғынын кеш түсинеди. Бундай жағдайларға жол қоймаў ушын барлық орынлардағы ПҲАЖ бөлими хызметкерлери жаслар арасында тез-тез ушырасыўлар өткерип, өзлериниң пайдалы мәсләҳәтлерин берип барады. Быйылғы жылы пайтахтымызда 950 жас шаңарақ некеден өткен болса, олардың барлығы бийпул медициналық тексериўден өткерилди. Олардың билим алыў, өнер үйрениўи, саламат, жетик инсанлар болып ержетиўи ушын жаратыл­ған имканиятлар жүдә көп. Булар елимиз жасларының келешеги айдын екенлигин де көрсетип турады.

Қ.ИСМАЙЛОВА,

Нөкис қалалық ПҲАЖ бөлими инспекторы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF