Еркин Қарақалпақстан Вести Каракалпакстана 22:46:45, 22.09.2019
Хош келипсиз! | RSS
Сайт мазмуны

Кириў усылы

«МУРАТБЕК МЕБЕЛЬ»ДЕ ИС ҚЫЗҒЫН

Үйиңе болама яки жумыс орнына болама, келген ҳәр қандай мийман көздиң тасасын алып дөгерегине урланып қарайды. Үйиңниң яки кабинетиңниң интерьери менен қызықсынады. Мебельлерге сер салады... Соның ушын қардар өнимниң сапасына, иреңине, шырайлылығына, беккемлилигине итибар береди.

«Шет ел мебельлеринен қалыспайтуғын өнимлер ислеп шығарып, халық ушын үлкен саўап ислейин» деп нийет еткен ҳалда банктен кредитлер алып, 2009-жылдың июнь айында кәрхана ашып, бары-жоғы 3-4 адам менен жумыс баслаған жас исбилермен Муратбек Тәңирбергенов «Муратбек мебель» деп аталыўшы жуўапкершилиги шекленген жәмийетти әсте-әсте кеңейтип барды. Ҳәзирги күнде бул кәрханада 26 адам мийнет етеди.

Кәрханада жумыс толық аяққа турғызылған. Италия, Германия, Түркия усаған бир қатар мәмлекетлерден жетилистирилген станоклар алдырылды. Солай етип, жумысты жаңа баслаған гезде бары-жоғы тек 7-8 түрдеги ғана мебель буйымларын ислеп шығарған болса, ал ҳәзир мебельдиң  30-40 түрин ислеп шығарыў қуўатлылығына ерискен.

Усы жерде айта кетерлик бир нәрсе, «Ташаббус-20l6» исбилерменлер таңлаўының республикалық басқышында бул жәми­йет биринши орынды жеңип алып, шөлкемлестириўшилердиң диплом ҳәм баҳалы сыйлығы менен сыйлықланды.

— Жумысшыларымыздан кеўлим тоқ. Айына орташа 250-300 миллион сум әтирапында өним ислеп шығарып турмыз,-дейди жәмийет баслығы М.Тәңирбергенов. — Биз буйыртпа тийкарында жумыс алып барамыз. Мәселен, бизге тийкарынан жаңа заманагөй үлгидеги турақ жайлар ҳәм мәкеме, кәрханалардан ҳәр қыйлы түрдеги мебельлер ушын буйыртпалар келип түсип атыр. Мебельлерди буйыртпашыларға жеткерип бериўди де өз мойнымызға алғанбыз.

Исбилерменликке кең жол ашылған усындай дәўирде кәрхананы толық аяққа турғызып, көзди қуўандырарлық дәрежеде жумыс алып барып атырған «Муратбек мебель» жуўапкершилиги шекленген жәмийети жәмәәтине ишлей ыразы болып қайттық.

О.СӘТБАЕВ.

СҮЎРЕТТЕ: Тимур Нурлепесов ҳәм Жамбыл Кенжебаевлар.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF