Еркин Қарақалпақстан Вести Каракалпакстана 21:11:06, 18.10.2019
Хош келипсиз! | RSS
Сайт мазмуны

Кириў усылы

СПОРТШЫЛАРЫМЫЗДА  ЖӘНЕ  ЕКИ  МЕДАЛЬ

Соңғы еки ҳәпте даўамында дүнья халқы тынышлық елшиси болған спорттың умытылмас демлери менен жасады. Басланған ҳәр қандай қайырлы истиң жуўмағы болатуғынындай, 5-августта старт алған «Рио-2016» ойынлары ертең тарийх еншисине айланады. Бул Олимпиада ғәрезсиз Өзбекистан Республикасы тарийхында ең жақсы ойынлардың бири болып қалатуғынына гүман жоқ. Себеби, Бразилияға жол алған атлетлеримиз ҳәр қашанғыдан да жақсы қатнасып, Ўатанымыз жасларының ҳеш кимнен кем емес екенлигин дәлиллей алды.

Сәршемби күни рингке көтерилген жерлесимиз Шахобиддин Заиров 52 килограммға шекемги салмақ категориясында әзербайжанлы боксшы, жәҳән чемпионы Элвин Мамишзаданы упайлар бойынша тәслим етип, ярым финалға жол алды ҳәм өзи ушын кеминде қола медальды нақ­лап қойды. Кеше кешқурын ол венесуэлалы Сегундо Финолёен менен финал жолламасы ушын гүрес жүргизди.

69 килограммға шекемги былғары қолғап шеберлери арасында болып өткен финаллық беллесиў көпшиликтиң дыққат орайында болды. Себеби, онда және бир боксшымыз Шахрам Ғиясов қазақстанлы Данияр Елеўсинов пенен Олимпиада чемпионлығы ушын гүрес жүргизген еди. Дерлик теңбе-тең өткен беллесиў жуўмағында бираз тәжирийбелирек болған Д.Елеўсинов азғана үстемлик пенен жеңиске еристи. Соған қарамастан, Шахрам Ғиясовтың гүмис медалын да жоқары жетискенликлердиң бири десек арзыйды.

Пийшемби күни бокс ышқыпазлары және бир қатар қызығарлы беллесиўлердиң гүўасына айланды. Дәслеп 56 килограммға шекемги салмақ категориясында ярым финал беллесиўлери болып өтти. Олардың биринде өзбекистанлы Мураджан Ахмедалиев кубалы Ровеси Рамиреске қарсы гүрес алып барды. Бул беллесиўде Рамирестиң қолы бәлент келди. М.Ахмедалиев болса Олимпиаданың қола медалын қолға киргизди. 75 килограммға шекемги салмақта қатнасып атыр­ған ўатанласымыз Бектемир Мелиқузиев болса ярым финалда мексикалы Мисаэл Родригеске ҳеш қандай имканият қалдырмады. Оның финалда кубалы Арлен Лопес пенен өткеретуғын күш сынасыўы ең қызықлы беллесиўлердиң бири болатуғынына гүман жоқ. Сондай-ақ, кеше кешқурын және бир боксшымыз Фазлиддин Ғайыпназаров та (64 кг.) россиялы Виталий Дунайцев пенен финал жолламасы ушын беллести.

Олимпиаданың жуўмақлаўшы күни алдынан спортшыларымыз 2 алтын, 1 гүмис ҳәм 5 қола медалын қолға киргизип, улыўма командалық есапта 29-орында киятыр.

С.ЖАНИЕВ.

СҮЎРЕТТЕ: Бектемир Мелиқузиев.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF