Еркин Қарақалпақстан Вести Каракалпакстана 22:26:51, 22.09.2019
Хош келипсиз! | RSS
Сайт мазмуны

Кириў усылы

ЕРТЕҢГИ КҮННИҢ ИСЕНИМЛИ ДАЎАМШЫЛАРЫ

Пайтахтымыздағы «Жаслар орайы»нда Өзбекистан Республикасы Ғәрезсизлигиниң 25 жыллығына бағышланып «Ғәрезсизлик пер­зент­лери» фестивалы алдынан «Ҳәким ҳәм жаслар» жойбары шеңберинде Қарақалпақстан Республикасы Министрлер Кеңесиниң Баслығы Б.Янгибаев пенен ушырасыў болып өтти.

Илажды «Камалат» ЖЖҲ Қарақалпақстан Республикалық кеңесиниң баслығы А.Данияров басқарып барды.

Ушырасыўда атап өтилгениндей, халқымыз ең уллы, ең әзиз байрамымыз болған елимиз Ғәрезсизлигиниң 25 жыллық байрамына пуқта таярлық көрмекте. Өзбекистан Республикасы Президентиниң «Өзбекистан Республикасында жас­лар­ға байланыслы мәмлекетлик сиясатты әмелге асырыўға қаратыл­ған қосымша илажлар ҳаққында»ғы қарары тийкарында жасларымыздың бәркамал ерк-ықрары күшли, еркин пикирлеўши кәмил инсанлар болып жетилисиўи ушын кең көлемли илажлар әмелге асырылмақта.

Ҳүрметли Президентимиздиң басшылығында жаратылып берилген бундай кең имканиятлардан пайдаланып атырған жасларымыз бүгинги күни өзлериниң ҳеш кимнен кем емеслигин, ҳеш кимнен кем болмайтуғынын ис жүзинде дәлиллеп көрсетпекте. Ҳәр жылы усындай бир қатар талантлы қызларымызға Зульфия атындағы мәмлекетлик сыйлық салтанатлы рәўиште тапсырылып келинбекте. Быйылғы жылы бул сыйлыққа пайтахтымыздағы 22-санлы улыўма билим бериў мектебиниң оқыўшысы Азиза Байжигитованың миясар болғанлығын айрықша мақтаныш пенен атап өтиў орынлы.

Жасларымыздың қолға киргизип атырған жетискенликлерин даўам еттиретуғын болсақ, Әжинияз атындағы Нөкис мәмлекетлик педагогикалық институтының студенти Рустам Жангабаев аўыр атлетика бойынша Азия чемпионатында жеңимпаз болған болса, усы күнлери Бразилияның Рио-де-Жанейро қаласында даўам етип атырған XXXI жаз­ғы Олимпиада ойынларында ең аўыр салмақта алтыншы орынды ийеледи. Өткен жылы каратэ-до бойынша Японияда өткерилген жәҳән чемпионатында Нөкис юридикалық колледжиниң питкериўшиси Айсәнем Алламбергенова биринши, грек-рим ҳәм еркин гүрес бойынша Босния ҳәм Герцоговина мәмлекетинде өткерилген Жәҳән чемпионатында Нөкис Олимпия резервлери колледжиниң питкериўшиси Турабек Тиркашев биринши, Шаходат Жоллыбаева үшинши, дзю-до бойынша Тайланд мәмлекетинде өткерилген Азия чемпионатында 2-санлы Нөкис меди­цина колледжиниң питкериўшиси Гүлнур Муратба­ева үшинши, дзю-до бойынша Қырғызстан Республикасының пайтахты Бишкек қаласында болып өткен Азия кубогинде пайтахтымыздағы 34-санлы улыўма билим бериў мектебиниң оқыўшысы Нилуфар Эрмағанбетова биринши орынларды ийеледи.

Жаслардың бундай жетискенликлери ҳүкиметимиз тәрепинен мүнәсип қоллап-қуўатланбақта. Орта арнаўлы оқыў орынларының 29 питкериўшиси илим, билимлендириў, мәденият, спорт салаларында көрсеткен жоқары нәтийжелери ушын жоқары оқыў орынларына тест сынақларысыз жеңилликли кириў имканиятына ийе болды. 2014-2016-оқыў жылында жоқары оқыў орынларының 36 студенти Президент, Наўайы, Улуғбек, Бердақ, Әжинияз, Ибрайым Юсупов атындағы стипендиясы, 14 студент «Камалат» стипендиясы, 15 студент «Камалат» таълим гранты» жойбарының жеңимпазлары болды.

Усы жыл 16-30-июнь күнлери пәнлер бойынша билимлер беллесиўиниң республикалық басқышында Төрткүл районындағы 30-санлы улыўма билим бериў мектебиниң 8-класс оқыўшысы Акбар Уринбаев химия пәнинен, Нөкис районындағы 1-санлы улыўма билим бериў мектебиниң 8-класс оқыўшысы Сәрбиназ Бердимуратова, Беруний районындағы 25-санлы улыўма билим бериў мектебиниң 7-класс оқыўшысы Айгерим Артықбаева өзбек тили пәнинен, пайтахтымыздағы 31-санлы улыўма билим бериў мектебиниң 8-класс оқыўшысы Азада Жақсымуратова менен 28-санлы улыўма билим бериў мектебиниң 8-класс оқыўшысы Дилфуза Искендерова қарақалпақ тили ҳәм әдебияты пәнинен биринши орынларды ийелеп, жеңимпаз болды.

Сүўретшилик бойынша Япония  мәмлекетинде болып өткен таңлаўда қатнасқан Хожелидеги 1-санлы «Меҳрибанлық үйи»ниң тәрбияланыўшысы Азамат Ташмухаммедов салған «Халықлар дослығы» мийнети 77 мәмлекеттен барған 26288 қатнасыўшы арасында жеңимпаз деп табылып, диплом ҳәм естелик саўға менен сыйлықланды.

Жас шаңарақларды қоллап-қуўатлаў, оларды турақ жайлар менен тәмийинлеў мақсетинде Елликқала, Хожели, Беруний, Әмиўдәрья, Нөкис, Төрткүл районларында ҳәм Нөкис қаласында көп қабатлы «Камалат» үйлери қурылып, жәми 310 квартира пайдаланыўға тапсырылды. Буннан тысқары, жас шаңарақларға коммерциялық банклерден 48 миллиард 450 миллион сум муғдарында жеңилликли ипотека кредити,  450 жас шаңараққа 2 миллиард 896 миллион сум муғдарында тутыныў кредити, 2550 студентке 11 миллиард 52 миллион сум тәлим кредити берилди.  Сондай-ақ,  1334 жас исбилерменге 20,6  миллиард сум, кәсип-өнер колледжлериниң 140 питкериўшисине исбилерменлик жумысын баслаўы ушын 1 миллиард 102,9 миллион сум муғдарында жеңилликли кредит қаржылары ажыратылды.

Бүгинги күни халықтың бәнтлигин тәмийинлеўге айрықша әҳмийет берилмекте. Қабыл етилген бағдарламаға муўапық, усы жылдың өткен алты айы даўамында жәми 27307, соның ишинде жасларымыз ушын 6005 жаңа жумыс орны жаратылды.

Жуўмақлап айтқанда, бүгинги күни жаслар мәселесине мәмлекетлик сиясат дәрежесинде итибар қаратылып, халқымыздың турмысында айрықша әҳмийетке ийе болмақта. Түрли тараўларда жемисли мийнет етип, өзлерине жүклетилген жуўапкершиликли ўазыйпаларды терең сезинетуғын жас жигит-қызларымызды көргенде елимизде әмелге асырылып атырған реформалардың ҳақыйқый даўамшылары өсип жетилип киятырғанына исенимиң және де  артады.

Илажда жаслар өзлерин қызықтырған сораўларға жуўап алды.

Ушырасыўға Қарақалпақстан Республикасы Министрлер Кеңеси Баслығының орынбасары М.Алеўов қатнасты.

Д.АБИБУЛЛАЕВ,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF