Еркин Қарақалпақстан Вести Каракалпакстана 22:53:56, 22.09.2019
Хош келипсиз! | RSS
Сайт мазмуны

Кириў усылы

ЖАҢАЛАНҒАН РЕКОРД

ЯМАСА РУСЛАН ДА – ЧЕМПИОН

Ҳәзирги ўақытта дүнья жәмийетшилигиниң дыққат орайында болып атырған «Рио-2016» Олимпиадасы да өзиниң жуўмақлаўшы бас­қышына кирип бармақта. Соны айрықша атап өтиў керек, быйылғы ойынларда ?атанымыз спортшылары ҳәр қашанғыдан да жақсы қатнаспақта. Буның тийкарында Президентимиздиң 2013-жыл 25-февральдағы «Өзбекистан спортшыларын 2016-жылы Рио-де-Жанейро (Бразилия) қаласында болып өтетуғын XXXI жазғы Олимпиада ҳәм XV Паралимпия ойынларына таярлаў ҳаққында»ғы қарары тийкарында алып барылған кең көлемли жумыслар жатыр.

Жеңил салмақтағы боксшымыз Хасанбай Дусматовтың Олимпиада чемпионы болғаны ҳаққындағы қуўанышлы хабардың изи суўымай атырып, спортшыларымыз екинши алтын медальды да қолға киргизди. Аўыр атлетика бойынша 105 килограммға шекемги салмақ категориясында беллескен журтласымыз, жәҳән ҳәм Азия чемпионы Руслан Нуриддинов дәс көтериўде 194, силтеп көтериўде болса 237 килограммлық штанганы көтерип, жарыс пьедесталының ең жоқары текшесине көтерилип, Ўатанымыз байрағының бәлент желбиреўине ҳәм гимнимиздиң жаңлаўына себепши болды. Оның силтеп көтериўде көрсеткен нәтийжеси Олимпиада рекорды болып есапланады. Сондай-ақ, усы салмақ категориясында қатнасқан және бир спортшымыз Иван Ефремов болса еки шынығыў нәтийжеси бойынша 414 килограммлық штанганы бойсындырып, бесинши орынды ийеледи.

Бир күннен соң помост­қа ең аўыр саламқтағы (+105 кг) спортшылар шықты. Бул беллесиўлерде де Өзбекистаннан еки атлет қатнасты. «В» топарында беллескен қарақалпақстанлы Рустам Жаңабаев еки шынығыў жуўмағына бола 432 килограммлық нәтийже менен өз топарында биринши орынды қолға киргизди. Улыўма жуўмақ бойынша болса оның көрсеткен нәтийжеси алтыншы орынға ылайық деп табылды. Сәрдар Досмуратов болса 11-орын­ға жайласты.

Боксшыларымыз көрсетип атырған нәтийжелер де пүткил халқымызды шексиз қуўанышқа бөлемекте. Өз салмақ категорияларында Шахрам Ғиясов финалға, Фазлиддин Ғайыпназаров, Мураджан Ахмадалиев, Шахобиддин Заиров, Бектемир Мелиқузиевлардың ярым финалға жол алыўы сайланды командамыз ушын және бес медальды тәмийинлейди.

Усы күнге шекем 2 алтын, 4 қола медальды қолға киргизген Өзбекистан олимпиадашылары улыўма командалық есапта 30-орында киятыр.

С.ЖАНИЕВ.

СҮЎРЕТЛЕРДЕ: Олим­пиада чемпионы Руслан Нуриддинов.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF