Еркин Қарақалпақстан Вести Каракалпакстана 19:11:36, 22.09.2019
Хош келипсиз! | RSS
Сайт мазмуны

Кириў усылы

ТУҢҒЫШ АЛТЫН МЕДАЛЬ

БОКСШЫ  ХАСАНБАЙ ДУСМАТОВТЫҢ МОЙНЫНА  ТАҒЫЛДЫ

Бразилияның Рио-де-Жанейро қаласында өткерилип атырған XXXI жазғы Олимпиада ойынларының тоғызыншы күни Ўатанымыз спортшылары ушын әжайып нәтийжени инам етти. Бокс бойынша беллесиўлерде 49 килограммға шекемги салмақ категориясында қатнасқан журтласымыз Хасанбай Дусматов алтын медальды жеңип алып, пүткил халқымызды үлкен қуўанышқа бөледи. Өзиниң дәслепки ушырасыўларында қазақстанлы Биржан Жақыпов, америкалы Нико Эрнандес сыяқлы күшли қарсыласларын жеңип, финалға шыққан Хасанбай шешиўши беллесиўде колумбиялы Юверген Мартинес Ривес пенен күш сынасты. Екшемби күни болып өткен бул беллесиўде үш раундта да жақсы ҳәрекет еткен ол қарсыласын упайлар есабында тәслим етти ҳәм Олимпиада чем­пионы деген атақты қолға киргизди.

Хасанбай Дусматовтың бул жеңиси елимиз ғәрезсизлигиниң 25 жыллығына ыла­йықлы саўға болыўы менен бирге мәмлекетимизде дене тәрбиясы менен спортты раўажландырыўға айрықша дыққат-итибардың айқын көриниси сыпатында баҳалаў мүмкин..

Сондай-ақ, спортшыларымыздың тек бул алтын медаль менен шекленип қалмағанын да атап өтиўимиз тийис. Бокс бо­йынша 91 килограммға шекемги шерим қолғап шеберлери беллесиўиниң ярым финалында Рустем Төлегенов россиялы Евгений Тищенкодан упайлар бойынша жеңилип, Олимпиаданың қола медалына ийелик еткен болса, грек-рим гүреси бойынша қатнасқан Элмурад Тасмурадов 59 килограмм­ға шекемги палўанлар арасында үшинши орын ушын болған беллесиўде қырғызстанлы Арсен Ералиевти 13:8 есабында жеңип, ол да қола медаль менен сыйлықланды. Демек, кешеги күнге шекем өзбекистанлы спортшылардың есабына бир алтын ҳәм төрт қола медаль жазылды ҳәм олардың саны және де көбейетуғынына толық тийкарлар бар. Себеби, грек-рим гүреси бо­йынша және еки, еркин гүрес бойынша болса төрт палўанымыз, таэквондошыларымыз, аўыр атлетикашыларымыз жарысларға енди түсетуғын болса, қалған салмақ категорияларындағы боксшыларымыз да өзлериниң жеңисли жүрислерин даўам етпекте. Әсиресе, бунда 69 килограммға шекемги салмақта Шахрам Ғиясовтың кубалы жәҳән чемпионы, «Лондон-2012» Олимпиадасының жеңимпазы Ронел Иглесиастан үстем келип, ярым финалға, сондай-ақ, Мурат Ахмедалиев, Бектемир Мелиқузиев, Шахобиддин Заиров, Фазлиддин Ғайыпназаров ҳәм Баҳадыр Жалаловлардың келеси басқыш­лар­ға жол алғаны дыққатқа ылайық.

С.ЖАНИЕВ.

СҮЎРЕТТЕ: «Рио-2016» ойынларының жеңимпазы Хасанбай Дусматов.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF