Еркин Қарақалпақстан Вести Каракалпакстана 23:18:56, 22.09.2019
Хош келипсиз! | RSS
Сайт мазмуны

Кириў усылы

МИЙНЕТЛЕРИ МҮНӘСИП БАҲАЛАНДЫ

Усы күнлери елимиз Ғәрезсизлигиниң 25 жыллығын мүнәсип күтип алыў ушын қызғын таярлықлар, байрам ҳүрметине ҳәр қыйлы илажлар, таңлаўлар өткерилмекте.

Жақында Қарақалпақстан Республикасы Баспасөз ҳәм хабар агентлиги, Мәденият ҳәм спорт ислери министрлиги, Жазыўшылар аўқамы, Телерадиокомпаниясы, Өзбекистан Журналистлери дөретиўшилик аўқамының Қарақалпақстан бөлими, «Сүўретлеў айнасы» дөретиўшилик аўқамы, «Қарақалпақфильм» киностудиясы мәмлекетлик кәрханасы тәрепинен өткерилген «Ең уллы, ең әзиз» таңлаўы жеңимпазларын сыйлықлаў мәресими болып өтти.

Оған таңлаў шөлкемлес­тириўшилери, тийисли министрликлер менен ведо­мостволардың басшылары, жәмийетшилик ўәкиллери, ғалаба хабар қуралларының хызметкерлери қатнасты.

Илажда Өзбекистан Республикасы Олий Мажлиси Сенатының ағзасы, «Қорақалпоғистон тонги» газетасының бас редакторы Г.Аннаклычева, Бийғәрез баспа ғалаба хабар қураллары менен мәлимлеме агентликлерин қоллап-қуўатлаў ҳәм раўажландырыў жәмийетлик қорының директоры А.Абдуллаев, Қарақалпақстан Жазыўшылар аўқамының баслығы К.Каримов, Өзбекистан Көркем өнер Академиясы Қарақалпақстан бөлиминиң баслығы        Г.Изентаева ҳәм басқалар шығып сөйлеп, ең уллы ең әзиз байрам — Өзбекистан Республикасы мәмлекетлик Ғәрезсизлигиниң 25 жыллығы менен қызғын қутлықлады.

Шығып сөйлеўшилердиң атап өткениндей, республикамыздың баспасөз, телевидение, радио  ҳәм көркем өнер саласында жумыс ислеп атырған барлық дөретиўши инсанлар елимиздиң экономикалық тийкарларын беккемлеўге қаратыл­ған ең әҳмийетли страте­гиялық бағдарламаларды, экономикамыздағы структуралық өзгерислерди әмелге асырыў, заманагөй кәрханаларды қурыў, оларды алдынғы технологиялар менен үскенелеў бағдарындағы жумыслардың мазмун-мәнисин көрсетип беретуғын, Өзбекистанның өз раўажланыў жолы, соның ишинде, пүткил дүнья тән алып атыр­ған «Өзбек модели» елимизди қүдиретли ҳәм жоқары потенциаллы мәмлекетке айландырып атырғанын көрсететуғын, медицина, билимлендириў салаларында ерискен жетискенликлерди сәўлелендиретуғын, үлги жойбарлар тийкарында салынып атырған заманагөй турақ-жайлар ҳәм инфраструктура тармақларын қәлиплестириў бойынша енгизилген бағдарламалардың социаллық әҳмийетин ашып беретуғын ҳәм басқа да усы сыяқлы елимиздеги барлық салаларда ерисилген жетискенликлерди сәўлелендиретуғын дөретпелери арқалы жемисли мийнет етип келмекте.

Илажда таңлаў жеңимпазларының мийнети мүнәсип баҳаланып, шөл­кемлестириўшилер тәрепинен таярланған арнаўлы диплом ҳәм саўғалар тапсырылды.

Илаж қатнасыўшылары белгили художниклер ҳәм фотохабаршылардың дөретиўшилик мийнетлери көргизбесин тамаша етти.

Илажға Қарақалпақстан Республикасы Жоқарғы Кеңесиниң комитет баслығы Б.Нурабуллаев қатнасты ҳәм шығып сөйледи.

Ә.Жиемуратов,

Қарақалпақстан хабар агентлигиниң хабаршысы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF