Еркин Қарақалпақстан Вести Каракалпакстана 18:13:21, 22.09.2019
Хош келипсиз! | RSS
Сайт мазмуны

Кириў усылы

ЖАҢА КИТАПТЫ ТАНЫСТЫРЫЎ МӘРЕСИМИ

Тарийхқа нәзер салар екенбиз, адамзаттың бахытлы ҳәм пәраўан жасаўы, еркин ҳәм азат, ҳақыйқый инсан сыпатында турмыс кешириўи қандай аўыр ҳәм машақатлы сынақларды басынан кеширгениниң гүўасы боламыз. Ҳәр сапары ҳақыйқый шыдам, беккем ерк-ықрар, күшли исеним ҳәм саламат пикирлеў ар­қалы инсаният өзиниң басына түскен түрли қыйыншылықларды жеңип өтип, ертеңги күни қәте ҳәм кемшиликлердиң тәкирар жүз бермеслиги ушын зәрүр жуўмақларды шығара алған.

Заманның өзгериўи менен инсаният алдында турған машқалалар кемейип қалған жоқ. Керисинше, олар өзлериниң дәслепки формалары ҳәм түрлерин бираз өзгертип, жаңаша мазмун-мағанада көз алдымызда қайтадан пайда болмақта. Бүгинги күнде пүткил инса­ниятты тәшўиш ҳәм қәўетерге салып атырған диний экстремизм ҳәм терроризм ҳаққында әйне усындай жуўмаққа келиў мүмкин.

Соны айрықша атап өтиў керек, бүгин дүньяның түрли мүйешлеринде, әсиресе, жақын шығыста муқаддес ислам дини атынан әмелге асырылып атырған терроршылық ҳәрекетлери, ислам түсиниги ҳәм идеяларын бузып түсиндириў арқалы сада адамларды алжастырыў жағдайлары динимиздиң кеңпейиллик, әпиўа­йылық ҳәм инсаныйлыққа бағдарланған сап таза тәлийматын халқымыз, әсиресе, жасларымызға дурыс түсиндириў зәрүрлигин күшейтпекте.

Өзбекистан Мусылманлар басқармасы тәрепинен соңғы жылларда бул бағдарда көлемли илажлар әмелге асырылып келинбекте. Халқымызды, өсип киятырған жас әўладты диний экстремизм ҳәм терроршылық сыяқлы жәмийетимизге жат иллетлерден қорғаў, ислам дининиң кеңпейиллиги темасында бир қатар китаплар баспадан шығарылды.

Жақында Ташкент қаласындағы «Movarounnahr» баспасында жарық көрген «Дүнья уламалары мүрәжаты» («Дунё уламолари мурожаати») китабы мине усындай әдебиятлардың бири болып табылады. Китапта бүгинги күндеги дүньяның алдынғы қатар уламалары тәрепинен ислам дининиң тазалығын сақлаў, түрли жала ҳәм дөҳметлерден, исенимимизге пүткиллей қатнасы болмаған гәп-сөзлерден қорғаў мақсетинде айт­қан пикирлери, баянатларынан үлгилер келтирилген. Сондай-ақ, китапта мусылман адамның туўры жолдан адаспаўы, бузғыншы күшлердиң азғырыўшы идеяларына алданбаўы ушын зәрүр болған усыныслар келтирилген.

Мухаммад ибн Ахмад ал-Беруний атындағы Нөкис орта арнаўлы ислам билим журтында усы китапты таныстырыў мәресими болып өтти. Қарақалпақстан Мусылманлары қазыятының жуўапкер хызметкерлери, район ҳәм қалалардың имам-хатиблери менен олардың орынбасарлары қатнасқан бул мәресимде Минис­трлер Кеңеси жанындағы дин ислери бойынша ўәкил Н.Жамалов, билим журты оқытыўшылары Ж.Искендеров, С.Ражаббаев, НМПИ Миллий идея ҳәм руўхыйлық тийкарлары кафедрасының муғаллими Ж.Үсеновлар сөзге шығып, «Дүнья уламалары мүрәжаты» китабының халқымызды, әсиресе, жасларымызды диний экстремизм ҳәм теорроршылық ағымлары сыяқлы жәмийетимизге жат иллетлердиң зыянлы тәсирлеринен қорғаўда тутқан орнын жоқары баҳалады.

С.ЖАНИЕВ,

арнаўлы хабаршымыз.

СҮЎРЕТТЕ: мәресимнен көринислер.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF