Еркин Қарақалпақстан Вести Каракалпакстана 23:20:48, 22.09.2019
Хош келипсиз! | RSS
Сайт мазмуны

Кириў усылы

ҒӘРЕЗСИЗЛИК  ПЕРЗЕНТИ

Еркинлик туўы көтерилген жылы туўылған перзентлер бүгинлиги тепсе темир үзетуғын, қайнап пискен, әйне жигитлик 25 жасқа шығып атыр. Соңғы жыллары Президентимиз тәрепинен жасларға қаратылып атырған итибар, көрсетилип атырған ғамқорлықлар өзиниң унамлы нәтийжелерин бермекте. Усындай жаратылған имканиятлардан ақылға уғрас пайдаланып атырған қәбилетли жасларымыз илим-билим, мәденият, көркем-өнер, спорт киби тараўларда өз жетискенликлери менен дүнья ареналарында мәмлекетимиз байрағын бәлент желбиретип, елимиз абырайын шоққыларға көтермекте. Усындай жаслардың бири Элёр Машарипов.

Оның спорт тараўындағы ҳәмме мақтанарлық жетискенликлерине ҳәўес ете отырып, ерксиз изге сәл шегинис жасаймыз. Бурын жасларымыз ушын усындай имканиятлар жаратылды маs Аўыл түўе қалаларда усындай спорт объектлери бар ма едиs Илаҳий күш пенен топ жарып шыққан спортшыларымыз дүнья ареналарына шыға алды маs Әлбетте, бундай сораўларға ҳеш екиленбестен жоқ деп жуўап беремиз.

Қараң, l993-жылы Әмиўдәрья районында туўылып, гүрестиң дзю-до түри бойынша бир неше мәрте Өзбекистан чемпионы, халықаралық турнирлердиң, Азия чемпионатларының жеңимпазы, халықаралық ГРАН ПРИ жеңимпазы, Жәҳән чемпионаты ҳәм Европа кубок жарыслары қатнасыўшысы ҳәм жеңимпазлар қатарынан орын алған Элёрдың табысларын көрип, Ғәрезсизликтиң қаншелли қәдирли екенлигин және де тереңирек аңлағандай боламыз. Әпиўайы аўыл баласының қанында бар. Атасы Шамурат Машарипов миллий гүрес бойынша өз дәўириниң ат шығарған палўаны болып, қариялар арасында жәҳән чемпионлығын қолға киргизген инсан.

Әмиў­дәрьяда мектепти табыслы тамамлап, Шыршық қаласындағы Олимпия резервлери колледжинде оқып жүрген дәўиринде-ақ спорт тараўындағы ерискен жетискенликлери себеп Нөкис педагогикалық институтының дене тәрбиясы факультетине туўрыдан-туўры студент болыў бахтына миясар болды.

— Дәслепки устазым атам болды. Соң гүрес түрлериниң әлўан сырларын үйреткен Чаршам Тәжимуратов, Маҳмуд Раджаповтай устаз-тренерлериме ҳүрметим бәлент, миннетдаршылығым шексиз,-дейди қыйқыўын бермеген аттың озбайтуғынлығын терең түсинген ол. — Иним Шарапатдин Балтабаев изимди басып киятыр. Бир неше мәрте Өзбекистан чемпионы болды. Еки мәрте жаслар ҳәм ересеклер арасында өткерилген Азия чемпионатында қатнасып, еки мәрте де пъедесталдың екинши бағанасына көтерилди. Өзи дзю-до соңғы жыллары бизиң районда жақсы раўажланбақта,-деп күледи қаҳарманымыз инисиниң келешегине үмит етип.

Әлбетте, бундай жаслардың келешегинен гүллән халқымыз үлкен үмитлер күтеди. Себеби, елимиздиң ертеңги келешеги, ғәрезсизлигимиздиң еле де беккемлениўи усындай жаслар қолында.

Қ.БАЙНИЯЗОВ.

СҮЎРЕТТЕ: Э.Машарипов.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF