Еркин Қарақалпақстан Вести Каракалпакстана 22:19:40, 22.09.2019
Хош келипсиз! | RSS
Сайт мазмуны

Кириў усылы

ЖЕРИ  БАЙДЫҢ  ЕЛИ  БАЙ...

Бийғәрез елимиздиң ҳәр күни жаңаланыўлар менен жаңалықларға толы. Жақында ғана ели-халқымызды үлкен қуўанышқа бөлеп, «Сүргил» газ кәни негизинде Корея Республикасы менен бирликте «Үстирт газ-химия» комплекси қурылысы табыслы жуўмақланғаны ҳәм салтанатлы рәсмий ашылыўына бағышланған мересим болып өткенде ғәрезсизлигимиздиң 25 жыллық байрамына сыйлы саўға ретинде қабыл етилген еди.

«Топырағы қунарлы, жер асты ҳәм үсти тәбийғый байлықлары мол Үстирт ­ ­ елимиз келешеги» деген Президентимиз И.Кәримовтың ибратлы сөзлерин қайта-қайта тилине алған «Үстирт газ-химия» комплекси жобаластырылған инфрадүзилме объектлерин қурыў ҳәм «Сүргил газ кәнин өзлестириў дирекциясы» унитар кәрханасы директорының биринши орынбасары, Қарақалпақстан Республикасы Жоқар­ғы Кеңесиниң депутаты Олим Оринбаев исханасы дийўалына илдириўли географиялық картадан көз алмады.

Қоңыратта туўылып өскен Олим Ташкент политехника инс­титутының нефть-газ факультетин питкергеннен соң өз қәнигелиги бойынша түрли тармақларында, «Үстиртгаз» унитар кәрханасының бас инженери лаўазымында ислеп атырған 2008-жылы «Сүр­гил» газ кәнине тийкар қурылажақ «Үстирт газ-химия» комплексиниң дәслепки жойбарын жасаўшы исши топарға кирген, «УзКоргазкемикал» қоспа кәрханасының дәслепки шөлкемлестириўши баслығы ретинде геологиялық барлаў жумысларына белсене қатнасады.

Усындай ийгиликли ислердиң басы-қасында бол­ған Олим Оринбаевты газ кәнлерине бай Мойнақ районының турғынлары үлкен исеним ҳәм ҳүрмет пенен Қарақалпақстан Республикасы Жоқарғы Кеңесине депутатлыққа сайлағанлықтан өз сайлаўшылары менен тығыз қарым-қатнасықта.

­­ Аўқамға бириккен жыллары нефть-газди тек қазып алып, экспортқа шийки зат ретинде жибериў менен шуғылланар едик. Ғәрезсизлик жылларына келип, стратегиялық әҳмийетке ийе нефть-газ, химия санаатымыз жедел пәтлер менен алға раўажланыў жолына түсти. Ең алдынғы технология­лар өндириске енгизилип, шийки затымызды қайта ислеў арқалы алынатуғын өнимлердиң түрлери көбейди. Комплекс ҒМДА мәмлекетлери арасында узақ мүддетли қаржыландырыў есабынан қурылған жойбар болғаны ушын халықаралық абырайлы басылымлар тәрепинен жоқары баҳаланып, сыйлықланады.

Қурылысы 20l2-жылы басланған бул комплекске газди бөлистиретуғын, этилен, полиэтилен, полипропилен ислеп шығаратуғын ҳәм энергия дереклери менен тәми­йинлейтуғын жәми бес завод, сондай-ақ, заманагөй инфраструктура объектлери салынып, ең соңғы маркадағы үскенелер орнатылған. Нәтийжеде улыўма нырқы 4 миллиард долларлық жойбардың әмелге асырылыўы жылына 4,5 миллиард кубметр газди қайта ислеў есабынан 3,7 миллиард кубметр газ, 387 мың тонна полиэтилен, 83 мың тонна полипропилен, l02 мың тонна пиролиз дистилляты ҳәм басқа да қымбат баҳалы өнимлер ислеп шығарыў мүмкиншилигине ийе болды. Комплексте бүгинги күнде l300 ге шамалас жоқары маманлықтағы қәнигелер жумыс ислесе, соның ишинде 300 ден асламы колледжлерди питкерген жаслар екени қуўанышлы жағдай.

Елимизде нәтийжели жумыслар ислеў ушын жаратылған қолайлы шараятлар, жеңилликлер менен кепилликлер сырт ел инвести­циясының көплеп кирип келиўине жол ашып бермекте. Сол арқалы экономикалық турақлы өсимди тәми­йинлеп, халқымыздың турмыс абаданлығын жақсылаўда бирден-бир тирегимизге айланбақта.

­ ­ Олим Юсупович, егер, комплексти бир тутас тири организмге санасақ, дирекция тәрепинен орынланыўға тийисли болған жумыслар ҳаққында айтып өтсеңиз...

­ ­ Әлбетте, бизлердиң үлесимизге ти­йисли жумыслар көлеминде сапа баслы көрсеткиш. Өндиристи үзликсиз шийки зат пенен тәмийинлеп барыў ушын жаңадан қудықлар қазылып, пайдаланыўға тапсырылды. Газди комплексте қайта ислеўши қурылмасы кеңейтилди. Оннан «Үстирт газ-химия» комплексине узынлығы l08 километр­лик газ ҳәм конденсаты үзликсиз жеткерилиўи ушын қубырлар тартылды. Қайта исленген газди комплекстен «Ақшолақ» компрессор станциясына тутастыратуғын узынлығы 7,2 километрлик товар газ қубырын қурдық. l03 километр аралықтан техникалық суў жеткерип бериў ушын суў тармақлары тартып келинди. Электр энергиясы менен турақлы тәмийинлейтуғын станциялардың қуўатлылықлары асырылды. Буннан басқа да тийисли орынларға жаңадан темир жол ҳәм асфальт жолларын апардық. Санаат ҳәм турмыслық шығындыларға арнаўлы орынлар таярланды.

Биринши гезекте мийнет адамларына қолайлы турмыс шараятларын жаратып бериў мақсетинде турақ жайлар менен социаллық турмыс объектлерин изли-изинен пайдаланыўға бергенимиз истиң өнимли ҳәм сапалы болыўына алып келмекте.

Ө.Өтеўлиев

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF